GIANGKON ni Provincial Environment and Natural Resources Officer sa Sarangani Province, Bong Tuballes nga mismo si Gov.Steve Chiongbian Solon ang nangutana kaniya unsa ang maayong buhaton sa mga medical waste sa ospital, bisan aduna nay medical waste facility ang Kiamba Municipal Hospital.
Kini tungod delikado ug makuyaw sa panglawas sa tawo ang mga medical waste, mao nga gipresenta matud pa ni Tuballes ang plano sa pagmugna sa medical waste facility.
Nahimo ang maong plano ug niadtong ulahing semana sa Desyembre 2021 gisugdan ang operasyon niini ug mokabat na sa 40 tons sa medical waste ang na-treat sulod lang sa usa ka bulan.
Butyag usab ni Tuballes, mokabat sa P19 million ang budget sa maong
Sarangani Medical Waste Treatment Facility ug ning tuiga, takda usab tukuron ang sanitary landfill category 3 ug plastic recycling facility sa probinsya. Sa karon plano sa Sarangani LGU nga himuong economic enterprise ang maong medical waste treatment facility aron maka-income usab ang probinsya gikan sa ubang ospital gawas sa Sarangani sa pagpa-treat sa ilang medical waste.
