Patay nang nadiskobrehan ug walay saput sa tibook lawas ang usa ka 27-anyos nga sales lady sud sa gi-abangan nga lawak sa Sitio Laguna Barangay Bulacao, Cebu City alas 11:00 sa buntag, Biyernes Agosto 2, 2024.
Giila ang biktima nga si Charina Relativo, 27 anyos, lumad nga taga Bulasa Argao, Cebu, dunay kaipon, bag-o lang naabot sa nasud gikan sa Saudi Arabia, ug usa ka buwan pa nga nagtrabaho sa usa ka dakong mall sa syudad sa Sugbo.
Base sa inisyal nga imbestigasyon sa Inayawan Police Station, nakit-an ang patay’ng lawas sa biktima human miadto sa iyang boarding house ang higala sa iyang live-in partner aron susihon kay wala na kini mureply sa mga text messages.
Nakurat na lang kini sa dihang nakita niya nga hubo na ang lawas niini ug giingong dunay sunog ang buhok samtang anaa sa tapad ang stove sa butane.
Sa paghinabi sa Brigada News FM Cebu mga silingan sa biktima, alas 11: 00 sa buntag nakadungog sila nga adunay misagunto nga tingog sa usa ka babaye samtang nakadungog sila nga dunay niingon nga lalaki sulod sa kwarto nga “ayaw dunggaba” apan wala sila nasayod kung kinsa.
Nasayran sa Brigada News FM Cebu nga ang biktima nisumbong kang Johnjie nga iyang kaipon nga adunay magsige og pamuso kon maligo siya sa gawas nga bahin sa ilang balay.
Sa pagkakaron, gipaubos na sa otopsiya ang lawas ni Charina Relativo.
Si Loreto Relativo, ang nagbangutan nga amahan nanawagan sa pag surrender sa criminal. Iyang gidayeg ang Inayawan sa paningkamot og unta dili molurang hantod dili makit-an ang kriminal.
Padayon pa ang gihimong imbestigasyon sa kapulisan aron matino og si kinsa ang responsabli niini.
