LEGAZPI CITY – Nakatalaan nang isaagi sa pagdangog kan junta-probinsya kan Albay an propwestong ordinansa kan Legazpi manungod sa pag-regulate kan mga water refilling station sa syudad.
Ini an segun kay Board Member Eva Ribaya kun sain kasabay man sa pag-oorolayan an manungod sa pagbabantay sa mga nagtitinda nin bottled purified water na obhetong maidiskuter kun aaprubaran ini sa paagi kan pagsabot sa kun ano an pinakalaog kan ordinansa, an magigin sistema kan pagpautob kaini orog na kun may mga kaipuhan pang baguhon.
Nagkapira sa mga piglalaomang maantendir iyo an author kan ordinansa na si Legazpi Councilor Alexander Jao, Department of Trade and Industry Albay Provincial Director Noel Bunao asin Provincial Legal Officer Jose Noel Rubio.
Magigirumduman na kakapasa pa sana kan ordinansa kan bulan nin Hunyo sa Sangguniang Panlungsod kun sain nagpuon nang maghagad an konseho ki dokumentos sa mga nag-ooperar ki siring na negosyo sa bilog na probinsya na nagde-deliver sa syudad nganing maaraman kun sirisay talaga an mga rehistrado asin bako pa.
