Maswerte nga wala mapilasan ang driver sang Toyota Hilux Pick-up matapos ini nga naglapaw kag nahulog sa karsada sa Barangay Codingle, Dumarao, Capiz.
Ginkilala ang driver sang salakyan kay Louie John Porras, 28-anyos, isa ka project engineer kag residente sang Lopez Jaena Street, Pototan, Iloilo.
Sandig sa impormasyon nga nakuha sang Brigada News FM Roxas City sa Dumarao Municipal Police Station, nagikan sa syudad sang Iloilo si Porras kag magapadulong kuntani sa Tibiao, Antique apang pag-abot sa lugar nga ginluntaran sang aksidente hinali nalang ini nga nadulaan sang kontrol sa pagmaniho kag bangud sa madanlog nga alagyan tuga sang pag-ulan aksidente ini nga naglapaw kag nahulog sa higad sang karsada.
Madasig naman ini nga ginrespondehan sang Dumarao BFP, Dumarao Emergency Response, Dumarao PNP kag mga pumuluyo agud nga mapasaka ang nasambit nga salakyan. | Judy Ann Juare
