Nagpalab-ot sang pagpanginbulahan ang City Government sa Roxas City Police Station sa panibag-o nga kadalag-an kag pagkilala nga ila nabaton halin sa pamunuan sang Philippine National Police kadungan sa selebrasyon sang ika-122nd Police Service Anniversary sa Region 6 sang damlag lang.
Ini ang ginpangunahan ni PNP Chief PGEN Benjamin C Acorda Jr kag PRO 6 Director PBGEN Sidney N Villaflor kaupod si PLTCOL Francisco Paguia sa pagbaton sang pasidungog sa Roxas City Police Station bilang Best Component City Police Station sa Region 6.
Ang Roxas City PNP man ang 1st Runner-Up Best City Police Station (Component City Category) – National Level.
Pamatuod ini sang maayo nga performance kag dedikasyon sang kapulisan sa pagmentinar sang kalinong kag katawhay sa syudad, madasig nga pagresolbar sang mga krimen, kampanya batuk sa ilegal nga druga kag iban pa nga programa nga nakabulig sa komunidad.
Pinaagi sa facebook post ni Mayor Ronnie Dadivas, nagpalab-ot ini sang pagdayaw sa mga katapo sang Roxas City PNP kag nagpahayag nga saligan sang kapulisan ang bug-os nga suporta sang City Government sa mga masunod nga inisyatibo.
Nagtambong man sa amo nga kahiwatan si Capiz PPO Provincial Director PCOL Jerome D Afuyog Jr kag mga opisyales sa nagkalain – lain nga LGU sa Western Visayas. | Judy Ann Juare
