Naaresto ro sambilog sa mga lider it notorious Libuna-Lego Gang kahapon it agahun, September 8, sa Cabatuan, Iloilo.
Ginkilaea ro inaresto nga si Joan Lego, 41 anyos, ag temporaryo nga nagaistar sa Brgy. Acao, Cabatuan, Iloilo.
Gin-aresto raya it mga miyembro it Cabatuan Municipal Police Station, Lambunao MPS, Pototan MPS, Guimbal MPS, Provincial Special Operations Group, 602nd ag 603rd Companies it Regional Mobile Force Battalion 6.
Inaresto si Lego kaibahan ro anang live-in partner nga si Maylin Araneta, 28 anyos.
Imaw hay naninahan kasunod it pakipagbarilan sa mga operatiba it pulisya nga nagpatuman it anang mga warrant of arrest.
Insigida man imaw nga dinaea sa Ramon Tabiana Memorial District Hospital para sa pagbueong.
Si Lego, kaibahan ro sambilog pang lider it gang na si Rowen Libuna, hay ginausoy bangud sa pag eabag sa Republic Act 10591 (Comprehensive Firearms and Ammunition Regulation Act) ag Republic Act 9516 (Illegal Possession of Explosives).
Imaw hay may warrant of arrest kaibahan si Joeffrey Vicente para sa robbery nga may Criminal Case No. 20-06-38 nga gin-isyu ni Judge Gemalyn Faunillo-Tarol it RTC6 Branch 76, Janiuay, Iloilo ku Agosto 11, 2020.
Nakarekober ro mga operatiba halin kay Lego ag sa anang partner it sangka homemade 12-gauge shotgun nga loaded it sangka ammunition, daywa pang live ammunition, sangka fragmentation grenade, ag sangka black bag.
Ro Libuna-Lego Gang hay kilaea sa robbery/hold-up ag gun-for-hire nga aktibidad bukon eamang it sa probinsya it Iloilo kundi sa iba pang parte it Region 6. / ANN DESLENE SALAZAR
