LEGAZPI CITY – Puminakol sa labi 3,000 an nairehistrong road accidents kan Land Transportation Office (LTO) Bicol sa bilog na rehiyon sa laog sana nin syam na bulan poon kan Enero sundo Setyembre ngunyan na taon.
Basado sa datos kan ahensya, uminabot sa 3,841 an road crash resulting to damage to property sa rehiyon, mas halangkaw kumpara sa nakalihis na taon sa kaparehong peryodo na 3,468.
Pinakadakol sa Albay na may 1,405; suminunod an Camarines Sur na 1,208; Naga City na may 699; Camarines Norte na may 308; Sorsogon na may 121; Catanduanes na may 70 asin Masbate na may 30.
Nairehistro man sa rehiyon an 219 na road crash resulting to death.
Nangenot digdi an Camarines Sur kun sain 73 an nagadan, sinundan kan Albay na may 43; pararehong 23 sa Camarines Norte, Masbate asin Sorsogon; 20 sa Catanduanes mantang 11 sa Naga City.
Mientrastanto, nakapagrehistro man an rehiyon nin 3,791 na road crash resulting to physical injury sa kaparehong peryodo.
Pinakadakol an Camarines Sur na may 1,882; sunod an Albay na may 936; Camarines Norte na may 368; Naga City na may 230; Catanduanes na may 277; 107 sa Sorsogon mantang 41 sa Masbate.
