Ikinalungkot at ikinadismaya ni Senate President Pro Tempore Loren Legarda ang naging pagguho ng lupa sa Maco, Davao De Oro.
Ito ay matapos nitong bawian ng buhay ang mahigit limampung kataong naninirahan doon habang pinaniniwalaang mayroon pang iilan na natabunan.
Ayon kay Legarda, dati pa lang ay idineklara ng ‘no build zone’ ang nasabing lugar, ibig sabihin bawal itong pagtayuan ng anumang bahay, establisyamento o gusali dahil malambot na ang lupa rito dala ng pagmimina.
Kung kaya’t maari umano sanang naiwasan ang trahedya kung sinunod lang ng bawat ahensya ng gobyerno ang geohazard mapping at batas pangkalikasan.
Kaugnay nito, planong isulong ni Legarda ang resolusyong naglalayong imbestigahan ang nangyaring landslide.
Ito ay ‘di para makahanap ng masisisi ngunit upang maiwasan itong mangyari muli.
