CAMARINES NORTE- Nakatakdang magtungo ngayong araw sa mga malalayong barangay ng Mercedes ang vaccination team mula sa Municipal Health Office para sa pagpapatuloy ng pagbabakuna kontra COVID- 19.
Ayon sa MHO Mercedes official facebook page magtutungo ngayong araw ang Resbakuna team sa mga barangay ng Lalawigan at Lanot.
Ang Lalawigan at Lanot ay ang mga dulong barangay sa naturang bayan na ilang beses na ring napuntahan para magbakuna.
Sa Huwebes naman ay ang islang Barangay ng Caringo ang pupuntahan ng vaccination team at may kasabay ring bakunahan sa Barangay 1 at Del Rosario.
Ang bakunahan ay para sa first dose kasama na ang pediatric population edad 5- 11 at 12- 17 gayundin ang adult vaccines para naman sa second dose at booster shot.
Hinihimok ng LGU ang mga residente sa nabanggit na barangay na huwag maniwala sa tsismis kaugnay sa bakuna.
Batay sa datos ng Provincial Covid- 19 Vaccination Operation Center hanggang noong Marso 25, nasa 62 % na ng target population na 44, 341 ang nabakunahan kontra COVID- 19 sa naturang bayan.
