Ginlunsar subong nga kahapon, lunes (Febrero 14, 2022) sa Teresita Lopez Jalandoni Provincial Hospital sa syudad sang Silay ang “Resbakuna Kids” ukon pagbakuna sa mga kabataan naga-edad sang 5 tubtub 11 ka tuig.
Ang ‘launching’ gintambungan nanday Negros Occidental Provincial Administrator Atty. Rayfrando Diaz II, Provincial Health Officer Dr Ernell Tumimbang, anay 3rd District Representative kag Provincial Consultant for Trade and Investments Promotions Alfredo Benitez, DOH 6 Representative Dr. Maria Myla Bernabe, Silay City Administrator Atty. Jose Edward Davila kag Silay City Councilor, Philippine Councilors League-Negros Occidental President kag Sangguniang Panlalawigan Member Ryan Gamboa.
Sa iya nga bahin, ginpahayag ni Dr. Tumimbang target sang nasambit nga pungsodnon nga programa sang DOH, Provincial Health Office kag sang Gobyerno Probinsyal sang Negros Occidental ang 363,249 ka mga kabataan sa bug-os nga probinsya naga-edad sang lima tubtub sa onse ka tuig.
Ang bakuna nga himo sang Pfizer ang gindiretso dala sa Teresita Jalandoni Provincial Hospital sa pagsugod sang nasambit nga ‘inoculation’ ukon ‘vaccination program’.
Suno kay Tumimbang wala sang dapat kabalak-an ang mga ginikanan sa pagpabakuna sa ila sini mga kabataan bangud ang formulasyon sang amo nga Pfizer vaccine ang tuhay sa bakuna nga ginagamit para sa may edad na mga pumuluyo ukon buot silingon “re-formulated” nga vaccine.
Ginpasiguro sang provincial health officer pananglitan magaabot ang supply sang vaccine para sa patigayunon nga rollout sa tagsa ka mga local government units (LGU’s) sa bug-os nga probinsya, nakahanda ang PHO sa pagpadala sang mga ini sa mga kabanwahanan kag syudad.
Pagahatagan sang prayoridad sang PHO sa sini nga programa para sa mga kabataan amo ang mga “high risk areas” kun sa diin madamo sang mga pumuluyo ang indi pa mga ‘fully vaccinated’./ Via Nimrod Zabala
