Gi-organisa sa nasyunal nga gobyerno ang Pamana: Regional Pre-SONA Series isip kabahin sa pagpangandam sa ikaunom ug ulahing State of the Nation Address (SONA) ni Pangulong Rodrigo Roa Duterte karung Hulyo 2021.
Matud ni Cabinet Secretary Karlo Nograles, kasamtangang Co-Chairperson sa Inter-Agency Task Force, tumong sa aktibidad nga mapabalo ug mapasabot sa publiko ang mga programa ug proyektong kalampusan sa administrayon, lakip ang mga plano alang sa nabiling termino sa Pangulo nga posibleng dili maapil sa iyang SONA.
Sa maong higayon mohatag usab og lakang ang gobyerno alang sa kasulbaran sa nagpadayong Covid-19 pandemic lakip na ang halapad nga pagbakuna.
Nagtambayayong sa pagplano ug pagpatuman niini ang National Economic and Development Authority (NEDA), Regional Development Councils (RDCs), chairpersons sa Cabinet Clusters, ug mga kauban sa Gabinete, sa direktiba ug giya sa Office of the Executive Secretary.
Sa bahin ni Sec. Nograles, isip nanguna sa Task Force Zero Hunger, usa kini ka dakong higayon aron mahibaw-an sa katawhan ang nalatag ug naduso nga mga programa sa gobyerno nga makasulbad sa kagutom, kalisod ug malnutrisyon sa nasud.
Nasayran nga sa kinatibuk-an, malampuson nga nalusad ang Pre-SONA series sa 12 ka rehiyon sa nasud kaniadtong Abril 15 sa Butuan City sa Caraga Region, Peñablanca, Cagayan atong Mayo 5; Legazpi City, Albay Mayo 11; Koronadal, South Cotabato kaniadtong Mayo 18; Calapan City, Oriental Mindoro atong Mayo 25; Baguio City atong June 1; San Fernando, La Union atong June 15; San Fernando City, Pampanga atong June 22; Tacloban City atong June 25; Cotabato City atong June 29; Calamba, Laguna atong July 6 ug sa Zamboanga
Sa karun padayon nga nakatutok ang gobyerno sa vaccination program batok Covid-19 ug ginapaningkamutan nga mapaspasan pa ang vaccine deployment ug pagbakuna sa mga rehiyon aron maangkon ang herd immunity sa nasud.
Giawhag na lamang ni Sec. Nograles ang katawhan nga maminaw ug motan-aw sa ikaunom ug ulahing SONA ni Pangulong Rodrigo Roa Duterte aron masayran ang mga programang nahimo sa administrasyon sulod sa lima ka tuig, ug ang mga napatuman nga kabag-uhang gisaad niini alang sa nasud ug sa katawhang Pilipino.
