Gin-athag ni RCTODA Chairman Wilson Devela nga wala sang plano ang asosasyon nga magpataas sang taripa sa tunga sang padayon nga pagtaas sa presyo sang gatong kag pagdamo sang colurum sa syudad.
Sa interview sang Brigada News FM kay Devela, nagasunod sa gihapon ang asosasyon sa City Ordinance nga ginpaguwa sang 2020 kun sa diin nagapabilin nga 10 pisos ang suktanany sa 1st 1KM nga byahe sang tricycle kag magadugang sang 5 pisos sa succeeding kilometers.
Iya man gin-ako nga may pila ka mga drayber ang nagakatintar nga magsukot sang mas mahal sa regular rates bangud sa nagakulang ang kita sa pagpamasahero.
Bangud sini, nagapanugyan si Devela sa sektor sang trisikol nga sundon ang nagakatama nga ordinance kag magkasugot sa pasahero agud malikawan ang gamo.
Samtang, ginpasiguro man sini sa publiko paga-aksyunan kag imbestigaran sang asosasyon ang mga reklamo sang pasahero batok sa mga abusado nga drayber.
Sa pihak nga bahin, nagpatigayon naman sang community hearing ang City Councilors kaupod ang pila ka mga sektor kag representante sang TODA angut sa pagpataas sang taripa kag posible pagdugang nga penalidad batok sa mga abusado nga drayber.
