PASADO na sa ikatulo ug katapusang pagbasa sa konseho sa dakbayan sa Mandaue ang ordinansa nga mag-adopt sa Paleng-QR Ph Plus program.
Busa, lauman nga ang tanang mga business establishments ug public transportation sa syudad, kinahanglan na unyang mosagop sa QR digital payments.
Uban sa pagsagop sa programa sa siyudad, ang mga negosyante ug lokal nga transportasyon sa Mandaue gimandoan sa paghimo sa QR Ph payments nga magamit sa ilang mga kustomer.
Ang pagbayad sa cash kung gipili sa mga kustomer ug mga pasahero kinahanglan tugutan usab.
Ang mga vendor ug mga drayber kinahanglang mag-abli ug magmentinar sa QR Ph-ready transaction account nga dili molapas sa unom ka bulan human sa pagka-epektibo sa ordinansa.
Kinahanglang makita usab ang QR PH code sa ilang mga tindahan ug pampublikong sakyanan aron magamit ang QR PH nga pagbayad.
Si Oscar Del Castillo, author sa ordinansa ug chairman sa committee on Market and Abattoir, niingon nga hinayhinay nga ipatuman ang maong programa.
Nasayran nga ang Paleng-QR Ph Plus Program nga gipasiugdahan sa Bangko Sentral ng Pilipinas (BSP) ug Department of Interior and Local Government (DILG) nagtumong sa pagpasiugda sa digital payments sa merkado publiko ug lokal nga transportasyon.///Michelle Craste
