Padayon nga ginabulong sa ospital ang isa ka Person with Disability (PWD) matapos ginlabo sa Barangay Quinat-uyan, Maayon, Capiz sang tinalikdan nga Agosto 2.
Ginkilala ang biktima kay alyas “Sebi”, 20-anyos, residente sang Barangay Poblacion Tabuc sa nasambit nga banwa samtang ang ginatudlo suspek amo si alyas “Richard”, yara sa legal nga pang-edaron, residente sang nasambit nga lugar.
Sandig sa imbestigasyon sang Maayon Municipal Police Station, nakit-an ang biktima sang iya mga ginikanan nga madamo sang pilas kag duguon sa guwa sang balay sang suspek kun sa diin nautod gid ang nawala nga kamot sini tuga sang pagpanglabo.
Nahibaluan, nabilin ang biktima sa ila balay antes ang insidente kag kun ini ang makaguwa naganilakat sang pinabuang tubtob nga nakalab-ot ini sa balay sang suspek. Ginapahayag nga nasal-an sang suspek ang biktima nga isa ka makawat.
Sa karon, hilway na sa kustodiya sang Maayon MPS ang suspek matapos nagtakop ang iya reglementary period of detention kag wala pa sang desisyon ang pamilya sang biktima kun magapasaka sang kaso batok sa suspek. | Judy Ann Juare
