Gibutyag ni Cebu City Acting Mayor Raymond Alvin Garcia nga ang Cebu City Government nipaubos sa kinatibuk-ang budget sa pag-host sa umaabot nga Palarong Pambansa 2024 ngadto na lang sa P262 million pesos, o pagkunhod sa 34.5% gikan sa orihinal nga budget nga P400 million pesos.
Matud ni Acting Mayor Garcia nga mahimong mas mo menus pa kini kung adunay mas ubos nga bids gikan sa mga partisipanteng kontraktor, nagkanayon sab si Garcia nga kinahanglang unahon sa Siyudad ang paggamit niini sa gisugyot nga mga galastuhan ug laslasan ang mga giisip nga mga sobra.
Sama sa kinahanglan niyang tangtangon ang gisugyot nga extension sa grandstand sa Cebu City Sports Center tungod kay wala pa kini magsugod ug dili kini mahimo nga makompleto sa oras sa Palarong Pambansa sa buwan sa Hulyo.
Ang ubang dagkong pagkunhod sa budget alang sa mga side event (gikan sa P60 million ngadto sa P20 million) ug alang sa LED screens nga gikunhoran ngadto sa P50 million.
Samtang giklaro ni Acting Mayor Garcia nga ang Probinsya sa Sugbo ug ang mga dakbayan sa Mandaue ug Lapu-Lapu maoy mosuporta sa dakbayan sa Sugbo sa umaabot nga Palarong Pambansa.
Gibanabana nga moabot sa 12,000 ka mga atleta ang moanhi sa dakbayan sa Sugbo alang sa maong kalihukan. Ang ilang mga pamilya, higala, ug mga tigpaluyo gilauman nga madugang sa gidaghanon sa kadaghan sa mga turista.
Si Acting Mayor Garcia niingon nga nalantawan sa dakbayan nga ila sab nga tukion ang mga kalihokan sa turismo dili lang sa dakbayan sa Sugbo apan lakip na niini ang tibuok probinsya,
Ingon man nga gimandoan na sab ni Acting Mayor Garcia ang buhatan sa Cebu City Tourism Office nga makig-alayon sa Kapitolyo ug sa duha ka siyudad sa paghimo og special rates o discounted tour packages alang sa mga atleta | Henry Luke Vestil III
