Gindayaw ni Philippine National Police (PNP) Chief General Dionardo Carlos si Patrolman Lhar Talaga, Assistant Police Community Relations it Caticlan Airport Police Station, Aviation Security Unit 6 sa Aklan, bangud sa madasig nga pagresponde kara sa sangka ginang nga nag-unga sa Brgy. Afga Tangalan, Aklan, ku Enero 27, 2022.
Nasayuran nga nagpangayo it bulig kay Pat. Talaga ro lola it eapsag nga nagtueod sa pulis agud nga umagto raya sa nasambit nga panimaeay.
Nagpatigayun it Internal Examination (IE) si Talaga sa pasyente ag nasayuran nga may 9-cm cervical dilation ro ina, senyales nga maeapit eon nga mag-unga ro pasyente.
Owa eon nag-aksaya it oras si Talaga ag naipatigayun kara nga mapa unga pinaagi it normal delivery ro ginang nga si Rachel Mae Panagsagan.
Si Talaga hay sangka registered nurse ag may eksperiensya sa pagbulig sa mga kaso it pag-unga. / ANN DESLENE SALAZAR
photo credit: Philippine National Police
