LEGAZPI CITY – Nagtao na nin paliwanag an Albay Provincial Social Welfare and Development Office (PSWDO) manungod duman sa dai nakakaresibe nin tabang pinansyal hale sa saindang opisina.
Katakod ini kan mga reklamo na pag nagpapasiring su boot sa saindang opisina, dai man sinda natatawan nin kwartang gagamiton para sa saindang mga kaipuhan.
Sa intrevista kan Brigada News FM Legazpi kay PSWDO head Ma. Vivien Cea, sinabi niya na an tinataong tabang sa paagi kan Assistance to Individuals in Crisis Situation (AICS), bako man su continuous na kada bes na madulok sinda, tatawan tulos huli ta bako man gabos na oras, igwa nin abilableng pondo.
Segun saiya, nagkakaigwa kaya nin interval. Dakol pa kaya su boot na prosesong pag-aagihan antes magkaigwa liwat nin pondo na gagamiton sa pagtatao nin tabang pinansyal sa mga nangangaipuhan.
Apwera kaini, may pig-uutob man sindang guidelines na suportado ki sarong provincial ordinance, kun sain kun pang-maintenance an kaipuhan ninda, kada anom na bulan sana sinda su boot pwedesir magdulok sa opisina.
Kaya an nangyayari, ire-refer muna sinda sa iba asin papabalikon na sana pag igwa su boot sindang maitatao.
Mientrastanto, sa ibong kani, nangangapodan man liwat si Cea sa gabos na nangangaipuhan na magdulok sa sainda asin bukas man su boot an saindang opisina para sa mga kahapotan o mga dai nasasabutan dapit sa saindang guidelines.
