Padayon ang pagnubo sang nabalhag nga kaso sang makalalaton nga Coronavirus Disease 2019 ukon COVID-19 sa probinsya sang Capiz.
Suno kay Governor Fredenil Castro, ang probinsya sang Capiz sa karun ang may pinakamanubo nga kaso sa bug-os nga Rehiyon 6 nga yara lamang sa 32 sa datos sang Capiz Provincial Health Office.
Ginpahayag man ni Castro nga epektibo ang pagbato sa pandemya bangud sa pag implementar sang minimum public health standard kasubong sang pagsuksok sang face mask, pag mentinar sang distansya kag paghugas sang kamot, subong man ang wala untat nga pagpahanumdom sa kampanya sang gobyerno probinsyal nga magsunod sa mga regulasyon angut sa pandemiya.
Nahibaluan sa datos sang Department of Health Western Visayas Center for Health Development (DOH-WV-CHD), yara lang sa 33 ang aktibo nga kaso sang COVID-19 sa Capiz. Mas manubo ikumparar sa nabalhag nga kaso sa masunod nga mga probinsya:
Aklan – 70; Antique – 52; Guimaras – 38; Iloilo – 1,688; Negros Occidental – 528; Bacolod City – 74; kag Iloilo City – 130.
Kadungan sini ginapangabay sang gobernador ang pumuluyo nga maghangay kag magsunod sa mga pagsulundan para sa ikaayong lawas agud padayon nga malikawan ang pagplapta sang sini nga balatian.
