Tanan nga pampubliko ag pribado nga sementeryo sa probinsiya it Antique hay pagabuksan para sa selebrasyon it All Saints ’Day (Nov. 1) ag All Souls’ Day (Nov. 2).
Base sa Executive Order No. 187-A it lokal nga gobyerno it Antique, ro pagbisita sa mga memorial park, sementeryo, ag columbaria kaangut sa Undas 2021 hay maga-umpisa sa Oktubre 25 hasta Nobyembre 2.
Dapat pasiguraduhon man it mga Local Government Units nga masunod ro mga ginapatuman nga minimum public health standards kapareho eamang it physical distancing ag pagsuksok it facemasks sa pagselebrar it Undas.
Kamana man, nagta-o it mga suhestiyon ro lokal nga gobyerno sa mga LGUs kapareho eamang it mga masunod:
* pagtukod it mga baranggay schedule sa pabisita sa sementeryo para malikawan ro overcrowding
* “no vaccination, no entry” policy; kinahangean nga magpresenta ro mga nagabisita it andang COVID-19 vaccination cards.
*ro mga indibidwal nga uwa pa it 18 anyos ag masobra 64 anyos hay pagbawaean nga makasuoed sa mga sementeryo
* pagbawae sa sugal, pagtipon, ag iban pa,
* 30 percent on-site capacity eamang ro pagasugtan sa mga sementeryo.
Ku nagtaliwan nga dag-on, ginpasarado it lokal nga gobyerno ro tanan nga pampubliko ag pribado nga sementeryo sa All Saints ‘Day ag All Souls’ Day bangud sa pandemya./JIL B. LACSON
