KALIBO, AKLAN—Nagahueat pa sa makarun do Police Regional Office 6 (PRO-6) it guidelines maghalin sa national office angot sa paggamit it 256 body cameras nga ginapanupod sa nagkasari-sari nga police units sa Western Visayas.
Suno kay Police Lieutenant Colonel Joem Malong, PRO-6 spokesperson, kinahangean do training bago do paggamit sa nasambit nga mga cameras kaeakip kara do reconfiguration, technical requirement ag do insakto nga pagbuyot ag pag-alaga sa equipment.
Do tagsa man sigon ka mga police station hay dapat nga may una nga command center nga raya do magamonitor sa hueag it nagagamit pinaagi sa Global Positioning Satellite (GPS) System nga naka-install sa body cameras.
Suno pa kay Malong, una eon sanda sa makarun sa proseso it reconfiguration ag kung matapos eon raya ag maka-establish it command center hay magapatigayon sanda it demonstration ag training angot sa pagbuyot it camera, recording process, data repair ag management kun sa siin do mga nakapatigayon it training hay raya eamang do makagamit it body cameras.
Nasayuran nga 192 body camera units’ hay nai-deliver eon sa 12 police stations sa idaeom it Negros Occidental Police Provincial Office (NOCPPO), 32 sa Iloilo, ag 16 kada isaea sa Roxas City police station ag Bacolod City Police Office.
Nauna eon nga ginpahayag ni PNP Chief, General Guillermo Eleazar nga do mga body cameras hay agud nga masiguro nga may una nga transparency sa mga police operations ag raya man do magatao it tuldok sa mga alegasyon nga do mga kapulisan hay eakot sa pagtanum it ebidensya ukon sa summary execusion it suspects. // SHERRY ANNE REUNIR-VIDAL
