REGULAR ang pagbantay sa Department of Trade and Industry (DTI) sa GenSan sa lihok sa presyo sa mga nag-unang papaliton. Sa naobserbahan sa DTI, gamay lang ilang nakitang lihok sa presyo gikan atong Hunyo 27-Hulyo 1. Tandi sa ilang monitoring gikan Hulyo 8-4, asa nakita nila ang 15 hangtud 30 sintabos nga kada piraso ang pagsaka sa presyo.
Ang produkto nga adunay gamay’ng usbaw mao ang canned goods og kape. Samtang sa stock keeping units, upat lang ka produkto ang adunay gamay nga paglihok sa presyo. Samtang mikanaog og 15 sintabos ang mga prime commodities.
Butyag ni Marvin Genita, labaw sa DTI-GenSan posibleng dili ilawom sa mandato sa ahensiya ang nagpasaka og presyo. Gipahinumdom niini sa mga negosyante ang hugot nga pagsunod sa Suggested Retail Price (SRP). Kahibaloan nga gikan sa 4.7% inflation rate atong Mayo, misaka sa 5.7% ang kapaspas sa lihok sa presyo sa nag-unang palaliton sa Soccsksargen.
Ang Soccsksargen ang gilangkuban sa Cotabato province, Sultan Kudarat, South Cotabato, Kidapawan ug General Santos City. (Richel Gubalani)
