NITAAS pa ang presyo sa karneng baboy sa Central Public Market sa General Santos City subay sa nakapaskil nga price list sa General Santos City Multipurpose Cooperative.
Sugod adlaw nga Lunes, Nobyembre 15 ang presyo sa pork belly anaa na sa P300 pesos sa matag kilo, ang unod P285 pesos, ang pang pata, ribs mascara P250 pesos, ang special bones P200 pesos, atay P150 pesos, laman loob P100 pesos ug ang impelya P130 pesos sa matag kilo.
Sumala sa pangulo sa meat vendors nga si Toto Mosqueda ang pagtaas dili tungod kanila kondili tungod nitaas ang demand ug niresulta sa pagtaas usab sa farmgate price gikan sa P150 pesos nahimo na nga P165 hangtud P170 pesos matag kilo.
Gidugang ni Mosqueda nga magpadayon ang trend hangtud sa Desyembre gumikan walay laing supply nga ilang kakuhaan gawas sa Gensan kay bawal pa magbyahe og hayop gumikan sa African Swine Fever kon ASF.
Samtang nagahimo usab og diskarte ang mga kan-anan, sumala kay Judeth Fuertes sa dihang nitaas ang presyo sa karne nitaas usab ang ilang presyo sa matag serve sa karne, gikan sa P30 pesos nahimo na karon nga P40 pesos, samtang sa serve sa gulay wala na sila naga-serve og tag P10 pesos kondili tag P15 hangtud P20 pesos na kay nimahal usab ang presyo sa gulay.
Kahibakluan nga gikumperma usab sa pangulo sa City Food Terminal nga si Abbie Gavilo nga nitaas usab ang demand sa pipila gulay padulong sa Luzon areas. ( Ver Diazon)
