DAKO ang giusbaw sa presyo sa matag sako sa bugas sa merkado, tungod sa dugang nga bayad sa gasolina sa mga sakyanan nga ginakargahan sa bugas nga kinompra gikan sa ubang lugar.
Sa Super Safi bugasan sa Gensan anaa sa P1,770 ang sako sa Bordagol rice, P1,820- Sinandomeng, P1,850- ang sinako sa Banay-banay ug kapin sa P1,890-ang sako sa 1-6-0 nga bugas ug maoy sagad ginapalit sa mga kustomer.
Segun ni Joven Nogodula Store incharge, kapin sa 20 pesos ang giusbaw sa sinako sa bugas ug gikan pa sa South Cotabato sila mangompra aron ibaligya sa Gensan.
Busa madak-an sila sa gasto sa gasolina sa sakyanan ug mobawi nalang sila pinaagi sa pagpataas sa presyo sa bugas.
Lakip usab sa rason nga adunay usbaw niini, tungod usahay walay harvest sa lugar nga ilang ginakomprahan ug mobiyahe pa padulong sa laing dapit kung asa mahal usab ang palit sa humay.
Samtang sa kinilo anaa sa 38-pesos ang pinakabarato ug 42-pesos ang pinakamahal sa matag kilo sa bugas. Saysay sa usa ka tindero sa Super Safi daghang kostumer ang mireklamo sa kataas sa presyo sa bugas ug uban pang pamaliton, apan kinahanglang silang mamalit alang sa pangkonsumo sa matag adlaw. I Enamie Mogpon
