MISAKA na sa 4,901,486 ang kinatibuk-ang populasyon sa Soccsksargen region atong 2020, base sa Census of Population and Housing (2020 CPH) nga gihimo sa Philippine Statistics Authority (PSA). Human nadungagan og 356,210 katao ang populasyon gikan sa 4,545,276 ihap atong 2015 census.
Ang ihap ang opisyal nga gideklara ni Pangulong Rodrigo Duterte ilawom sa Proclamation No. 1179 nga gipagula atong Hulyo 6, 2021. Sa presentasyon ni Ismael Ramos Jr., Chief Statistical Specialist sa PSA gipresenta niini ang kinatibuk-ang ‘living persons’ sa rehiyon.
Kung itandi sa mga nakalabay’ng census ang 1.6 % Population Growth Rate (PGR) ang labing ubos gikan 1970. Ang ihap sa kinatibuk-ang populasyon ang gikan sa Cotabato province nakatala og 975,476, Sultan Kudarat -854,052; General Santos City dunay 697,315; Sarangani Province -558,946 ug Cotabato City nga karon ilawom sa BARMM ang dunay 325,079 populasyon atong 2020.
Nanguna ang Polomolok, South Cotabato sa munisipalidad nga labing daghan tawo nga dunay 172,605 samtang ‘least populous’ mao ang Columbio sa Sultan Kudarat nga dunay 26, 817 populasyon.
Matud ni Atty. Maqtahar Manulon, director PSA-12 hagit sa mga lokal nga panggamhanan ang pagsaka sa ihap sa populasyon hinungdan nga kinahanglang mahimong balanse ang himoong lakang aron masiguro nga mahatag ang mga serbisyo sama sa pabalay, food security ug trabaho. ( Richel Gubalani)
