KALIBO, AKLAN—Ginaduso sa makarun it Poblacion Kalibo Brgy. Council do sangka ordinansa may kaangtanan sa paglimita it mga mass gatherings.
Ginpahayag sa Brigada News FM Kalibo ni Barangay Kagawad Mark Sy nga do tinutuyo it anang ginbaeay nga ordinansa hay agud nga malimitahan do pagpatigayon it mga pagtipon-tipon para malikawan do pag-abo it kaso it deadly virus.
Do nasambit sigon nga tikang hay kasunod it andang ginpatigayon nga monitoring at pag-istudyo kung siin sa 34 nga aktibong kaso sa makarun it Poblacion Kalibo kaabuan sa mga raya hay natapnan bangud sa pag-atindir sa mga mass gatherings kapareho it birthday, kasae ag bunyag.
Ingkaso nga maaprubahan at maipasa do nasambit nga ordinansa, pagatawgon raya nga COVID-19 Mass Gathering Ordinance ag sa oras nga maipatuman hay do nagakaigo nga multa hay tag-Php 1,000 sa tagsa ka mga violator.
Nauna eon nga ginpahayag ni Dr. Cornelio Cuachon, Jr., it Aklan Provincial Health Office nga base sa andang contact tracing, do mass gathering do rasun kung ham-an it sumaka do kaso it COVID-19 makarun nga buean it Mayo sa probinsya it Aklan. // SHERRY ANNE REUNIR-VIDAL
