Ipinag-utos na ng Philippine National Police (PNP) sa mga opisyal nito na makipag-coordinate sa mga lokal na pamahalaan kaugnay ng mga dokumento na dapat i-presenta sa quarantine control points.
Ito ay matapos na sabihin ng Department of Health (DOH) na posibleng i-require pa rin ang COVID-19 tests para sa mga fully vaccinated tourists sa kabila ng unang announcement na ipresenta na lamang ang vaccination cards.
Ayon kay NP chief Gen. Guillermo Eleazar, para maiwasang malito ang mga turista kung ano ang dapat nilang dalhin sa pagbiyahe nila sa iba’t-ibang panig ng bansa, nakikipag-coordinate na ang kapulisan sa LGUs.
Aniya, pinaplantsa pa ng iba’t-ibang ahensya ng gobyerno at ng Inter-Agency Task Force (IATF) ang polisiya.
Una nang niluwagan ng IATF sa Resolution 124-B, ang mga patakaran sa interzonal travel ng mga indibidwal na fully vaccinated na.
Kasunod nito, inanunsyo ng ilang local tourist spots gaya ng Baguio at Davao na pwedeng ipresenta nalang ng fully-vaccinated persons ang kanilang vaccination cards nang di na nagpapakita ng COVID-19 test result.
Ang Boracay naman, patuloy umano silang magre-require ng negative COVID-19 tests sa mga turista sa loob ng 72 oras bago dumating sa Boracay hanggang di pa sila nakakapag-setup ng sistema para ma-validate ang vaccination cards.
