Tiwala ang Philippine National Police na makatutulong sa paghuli sa mga suspek ang pagsasapubliko ng larawan ng 2 sa limang salarin sa pananambang sa photojournalist na si Joshua Abiad noong June 29.
Ayon kay PNP Spokesperson PCol. Jean Fajardo, tukoy na rin ng Quezon City Police District ang tatlo pang suspek sa pamamaril ngunit nag-iingat aniya sila sa paglalabas ng mga impormasyon upang hindi ma-preempt ang ginagawa nilang follow up operation.
Hiningi rin ni Fajardo ang kooperasyon ng publiko sa pagbibigay ng mga impormasyon na maaaring magresulta sa paghuli sa mga suspek at tiniyak niyang mananatiling confidential ang kanilang pagkakakilanlan upang ma-protektahan ang kanilang kaligtasan.
Sa ngayon wala pa aniyang matibay na motibo ang PNP sa nangyaring pamamaril hangga’t hindi pa nahuhuli ang limang salarin.
