NANGANDAM na unta ang pipila sa ilang pagbesita sa mga sementeryo sa umaabot nga Undas apan mausab ang ilang schedule sa pagbesita gumikan sa naga padayon nga regulasyon sa DILG gumikan sa pandemya.
Sumala kay City DILG Director Relimin Sandoval nga nagpabilin ang kamandoan sa nasudnong gobyerno kalabotan sa Undas 2021 nga angay sundon sa katawhan, luwas lang kon adunay bag-ong kamandoan.
Subay sa IATF Resolution number 72 ang tanang sementeryo pribado o pang publiko, memorial parks lakip columbaria tibuok nasud kinahanglan sirado sa mga besita October 29- November 2. Samtang sa mga adlaw nga ginatugot kinahanglan anaa lang sa traynta porsyento sa kapasidad.
Sumala usab sa labaw sa City Housing nga si Department Head II Mary Ann Calonzo Tan susama sa gihapon ang regulasyon sa DILG ug IATF karong umaabot nga Undas, nga ginabawal ang pagbesita sa mga sementeryo sa mga petsa sugod Oktubre 29 hangtud Nobyembre 2, samtang ginatugot ang pagbesita gawas sa maong petsa.
Aminado usab si Tan nga lisod ma-control kon magdasok ang nagabesita sama sa Antonio Acharon Memorial Park kay libo libo ang nagabesita mao nga aduna silay ginahimo nga mga pamaaagi.
Mao nga sa karon palang nagapahibalo na siya sa patakaran subay sa kamanduan gikan sa DILG, nakig-estorya na usab kini sa mga personahe gikan sa mga sementeryo.
Sumala kay Linda usa ka residente sa Barangay San Isidro nga ‘ok’ nalang kon mao kana ang protocol sa gobyerno apan sa iyang opinion itugot unta sa saktong petsa kay aduna na silay plano nga magbesita sa Oktuber 31 sa Montecielo og sa Bawing Cemetery.
Alang kay Linda, open space man ang sementeryo unya dili man dikit dikit ang mga tawo apan wala na daw mahimo musunod lang sa mando sa gobyerno.
Kahibaluan nga si Nanay Linda biktima sa kawalay hustisya gumikan sa pagpusil patay sa iyang bana ug anak sa milabay na nga katuigan.
Sumala usab kay Judith nga taga Barangay Calumpang ang ilang plano sa Nobyembre 4 na moadto sa ACAMP susama usab sa ilang gihomo milabay nga Undas aron malikayan ang tapok sa mga tawo ug ang baga nga trapiko. ( Ver Diazon)
