Pinaagi it sangka resolusyon, ginpaabot it Sangguniang Bayan it Kalibo ro andang suporta sa intensyon ni Kalibo Mayor Juris B. Sucro nga direktang pamunuan ro Kalibo Santo Niño Ati-Atihan Festival 2023.
Ginhinyo man it Sangguniang Bayan it Kalibo nga insigida nga umpisahan ro pagplano sa mga aktibidad sa Ati-Atihan.
Matandaan nga gin-anunsyo ni Kalibo Mayor Sucro sa anang unang Executive Meeting ku July 1, 2022 nga ro LGU Kalibo ro direktang magapamuno sa Ati-atihan Festival sa baylo nga pamunuan it third party non-government organization.
Ro Kalibo Santo Niño Ati-atihan Festival, hay kilaea bilang “Mother of All Philippine Festivals”.
Raya ro naga isaeahanon nga Philippine festival ag sambilog sa 12 Southeast Asian festivals nga nakasueod sa Everfest’s FEST300, sangka listahan it 300 Best Festivals on Earth nga na-curate it international festival authorities. / ANN DESLENE SALAZAR
