Magapanao it daywang kilong bugas ag food packs ro LGU Kalibo para sa mga magapa first ag second booster shots.
Tinutuyo it LGU Kalibo nga pataason ro vaccination rate it mga Kalibonhon agud may depensa ro publiko halin sa Covid-19 virus.
Isaea man raya sa manami nga paagi agud maprotektahan ro mga residente nga matamaan it Covid-19 makarun nga may mga nailistang mga tinamaan kara base sa listahan it MHO.
Sa maabot nga Hulyo 22 hay magapatigayun it Booster shots sa Barangay Pook ag Old Buswang ag haum eon ro food packs nga igapanao sa mga magapabakuna.
Nasayuran nga sa presente, may una nga 11 aktibong kaso it nasambit nga sakit sa Kalibo, daywa ro bag-ong nailistang kaso kung siin ro sambilog kara hay halin sa Barangay Pook ag ro sambilog hay halin man sa Estancia.
May nakarekober man nga sambilog nga pasyente halin sa Barangay New Buswang base sa datus it Municipal Health Office it Kalibo. / ANN DESLENE SALAZAR
