Malaking bahagi ng Metro Manila, CALABARZON at Central Luzon ang nalubog sa baha dahil sa pananalasa ng bagyong Carina at Habagat.
Sa pag-iikot ni Pangulong Bongbong Marcos kabilang sa Mauban, Quezon, napansin ng Pangulo na may pangangailangang ayusin ang flood control design.
Sa situation briefing sa Mauban, Quezon, ipinunto ng Pangulo na hindi nangingilala ng boundary ang tubig kaya dapat maging national plan ang flood control na sumasakop hindi lang sa isang bayan kundi mapapakinabangan din ng hanggang limang magkakatabing rehiyon.
Kailangan din anyang iayon ang mga flood control sa kasalukuyang panahon, at ikonsidera ang climate change tulad ng pagtaas ng tubig dagat.
Dahil ang mga kasalukuyan anyang flood control ay naka disenyo lang sa klase ng baha noon.
