APEKTADO na sa tag-init ang mga mag-uuma sa mga agricultural barangays sa munisipyo sa Alabel, Sarangani Province
Ang maisan ni Ben Edoque, 64-anyos sa Purok 1, Domolok, Alabel ang nalaya tungod sa init ug gamay lang nga ulan, subra katunga sa halos tulo ka ektarya nga maisan ang nalaya gikan sa punoan hangtud sa udlot sa bulak ug nikuyos ang mga bunga sa mais.
Gamay usab ang bag-ong bunga sa lubi nilang Roseta Cerna, 63- anyos mao nga malaumon sila kon adunay ayuda gikan sa gobyerno.
Gumikan sa epekto sa init nagdeklara na og State of Calamity ang Barangay Domolok ug Tokawal.
Sumala kay Tokawal Kapitan Virgilio Tamayo anaa sa 60 porsyento sa ilang agricultural areas ang apektado sa init.
Sumala usab kay Domolok Kapitan Patricio Degamo anaa sa 80 porsyento ang apektado sa ilang agri areas.
Gipahayag usab ni Mayor Vic Paul Salarda nga andam siya ug ang Sangguniang Bayan nga magdeklara og state of calamity sa tibuok munisipyo aron mahatagan og ayuda ang mga mag-uuma. I Ver Diazon
