Daina E. Gerona
Nagataragaktak ang luha, huyhoy ang pako samtang nagapanalaysayon ang isa sa mga tag-iya sang baligya-an nga ginlamon sang kalayo ginabulubanta las 3:30 sang hapon, adlaw sang myerkules, hulyo 17, sa Prk. 1, Brgy. Dancalan, banwa sang Ilog.
Kalakip sa mga nangin abo ukon totally damaged amo ang motor parts nga ginpag-iyahan ni Teng Salinas, ulatanan kag grocery store nga ginapanag-iyahan ni Remya Silvano, Bugasan kag baligya-an sang mga bubud sang manok subong man feeds para sa baboy nga ginapana-iyahan ni Larry Santa Ana kun sa diin gina-alegar, ginhalinan sang kalayo kag duha ka mga panimalay nga partially damaged nga ginpanag-iyahan nanday Dolores Sancho isa ka senior Citizen kag Ruby Demprancia nga nagabaligya naman sang batchoy kag iban pa nga mga street foods.
Base sa panalaysayon ni Remya Silvano nga nakibot na lamang ini samtang nagabaligya sa iya isa ka customer nga gulpi nagsinggitan ang bata sang tag-iya sang Bugasan nga isa ka 16-anyos nga may sunog, dali-dali naman ini nga nagdalagan sagwa, apang bangud nga himo sa light materials ang kalabanan nga parti sang tatlo ka mga baligya-an madasig ang pag-ibwal sang kalayo.
Dugang pa niya nga, sa kapin 20 ka tuig niya nga baligya diri, karon pa lang gid lamang nagluntad ang amo nga insidente.
Sa inisyal nga pagbulubanta naglambot sa kapin Php 150, 000 ang kabilugan nga halit nga ginbilin sang sunog kag nagapabilin naman nga wala pa makumpirmar sang katapo sang Bureau of Fire Protection sang Ilog ang ginhalinan sang kalayo.
Samtang, suno pa sa panalaysayon sang kaingod sini pati na ni Remya, gina-alegar nga bangud sa spark sang isa sa mga appliances sa baligya-an sang bugasan kag sa gina-alegar nga ginabaligya man sini nga gasolina.
