Madinalag-on ang pinakauna nga State of the Municipality Address (SOMA) ni Sigma Mayor Dante Rizal Eslabon nga ginhiwat sa Sigma Civic Center kadungan sa selebrasyon sang ika-125th Independence Day, Hunyo 12, 2023.
Sa pamulong-pulong ni Eslabon, una niya nga ginpasalamatan ang mga pumuluyo sang Sigma sa paghatag sang pagsalig sa iya nga mangin amay sang banwa kag nagpahayag man ini nga iya pagabayluhan sang maayo nga pagserbisyo.
Ginpabugal man sang alkalde ang iya mga proyekto nga Infrastructure, Education and Environment, Sports and Social Service, Livelihood Program, Agriculture and Arts, Business and Trading, Opportunity, Nutrition and Health sa diin may acronym nga “I-ESLABON”.
Ginpatpat man sini ang mga proyekto nga iya hinimuan kag igapatigayon pa lang.
Suno kay Eslabon nakabakal na sila sang 22 tanan ka rescue vehicles kag ginpanagtag sa 22 man ka kabarangayan sa nasambit nga banwa kag dako gid ini nga bulig sa mga pumuluyo sa tion sa emerhensiya.
Lakip sa iya mga hinimuan amo ang pagpakaayo kag pagpalapad sang mga karsada sa barangay road kag pagbutang sang mga arko nga “Welcome to Sigma the heart of Capiz” sa apat ka boundaries.
Ginatutukan man sini ang ikaayong lawas sang mga pumuluyo ilabi na ang mga katigulangan kag paghatag sang Scholarship sa mga kabataan nga luyag mag-eskwela apang wala sang ikasarang ang mga ginikanan nga suportahan ang pagtuon sang ila anak.
Ginpahayag man ni Eslabon nga milyones ang iya ginpain nga pondo sa mga proyekto nga ginapatuman kag igapatuman pa lang kasubong sang pagpakaayo sang pila ka mga barangay hall kag dredging project ukon pagpadalom sang suba sa Sigma bangud isa ini sa mga ginabaha sa tion nga magbubo ang mabunok nga pag-ulan.
Nagtambong sa SOMA ni Eslabon si Capiz Governor Fredenil Castro, 2nd District Congressman Inday Baby Jane Castro, Vice Governor James Mitang Magbanua, pila ka mga board members sa probinsya sang Capiz kag madamo sang iban pa. | Judy Ann Juare
