Madinalag-on kag malipayon nga naggradwar sa Coast Guard Non-Officers’ Course ang 395 tanan ka bag-o nga enlisted personnel sang Philippine Coast Guard nga Class 96-2022 “Sibol-Sandagat” nga ginpatigayon sa Coast Guard Education, Training and Doctrine Command Regional Training Center sa Capiz.
Nangin Guest of Honor diri si Philippine Coast Guard Commandant Admiral Artemio M Abu.
Nagtambong sa nasambit nga kahiwatan si Roxas City Mayor Ronnie Dadivas.
Nagpasalamat si Dadivas kay Abu sa pagpili sa Roxas City kag Capiz nga mangin Regional Training Center sang sini nga batch kag nagpahayag man ini sang suporta sa palaabuton nga plano agud ilabi pa nga mapabakud ang pwersa sang PCG nga ginakabig Fronline sa pagproteksyon sang kadagatan nga sakup sang teritoryo sang Pilipinas.
Ginalauman nga ang 395 nga nag-gradwar ang mangin maayo nga dugang sa manpower sang Coast Guard kag miyembro sang komunidad kag kabay nga kabigon nila ang ginsumpaan nga propesyon ang indi lang basta palangitan-an kundi pagserbisyo sa publiko kag daku nga responsibilidad sa pungsod.
Ginapanginbulahan kag ginapasalamatan man ni Dadivas ang mga opisyales sang PCG sa likod sang madinalag-on nga regional training nga amo sanday Coast Guard Education Training and Doctrine Commander Rear Admiral Eustacio Nimrod P Enriquez, Commander, CG Commodore Arnaldo Lim Commander, CG Western Visayas, Coat Guard Capiz Command Officer CDR Jose Jacinto Jr, CO Regional Training Center CDR Ed Diaz kag Course Director CG LTJG Carlo dela Cruz. | Judy Ann Juare
