-Reymund Titong
KABANKALAN CITY, Philippines — Sa madako nga kapierdihan sang sektor sang agrikultura bangud sang El Nino phenomenon, nag-agunto ang mga mangunguma sang kapi-ot sang pagpangabuhi kag pagsinalayo.
Pahayag ni Isidro Genol, board of director sang Kalibutan Incorporated kag Masipag-Visayas regional management team, magluwas sa mga ayuda sang gobyerno nga gina-hatag nga ayuda sa mga apektado sang kalamidad parihas sang El Niño ukon La Niña, dapat mangin agrisibo sa pagdihon sang mga sustinabli nga plano para sa sector sang agrikultura.
Para kay Genol, dapat mangin aktibo ang gobyerno sa pag edukar sa mga mangunguma, tuhoy sa mga alternatibo nga mga tikang agud ma hagan-hagan ang epekto sang mga kalamidad nga ginakunsidar nga tuigan nga nga gina-atubang sang mga mangunguma.
Sa piyak nga bahin, ang Masipag (Magsasaka at Siyentipiko para sa Pag-unlad ng Agrikultura) sa Negros, ang bukas man sa pa pa-ambit sang ila mga teknolohiya pang agrikultura kaupod ang gobyerno, para sa paglab-ot sang isa ka tumong — ang pagbulig sa mga mangunguma sa kaumhan nga mangin manami ang ila pagpanguma kag mabuhinan ang kapigaduhon.*
