GIHATAGAN og rate nga 9 gikan sa 1-to-10 ang epekto sa giyera sa Russia ug Ukraine sa Pilipinas.
Segun ni Professor Richard Pernia, usa ka university professor ug political analyst nga bisan layo ang Pilipinas, maapektuhan gihapon ang ekonomiya niini tungod pulos supplier sa produktong petrolyo ang Russia ug Ukraine.
Gani, bisan wala pa ang giyera mitaas na ang presyo sa produktong lana ug samot nga kini mosaka tungod sa maong kagubot hinungdan nga magkalisod ang ordinaryong katawhan, tungod motaas usab ang presyo sa mga palaliton.
Gipanghinaut na lamang ni Pernia nga dili na mosangko sa paggamit og mga dagkong kahimanang igugubat ang giyera tali sa Russia ug Ukraine aron dili mokatag ang kasamok.
Sa karon hangyo usab niini sa katawhan nga masabtan pag-ayo ang ugat hinungdan sa kagubot, mahimong objective ug mag-ampo nga maundang na ang giyera.
