LEGAZPI CITY – Nagpepreparar na an Gobyerno Probinsyal kan Albay (PGA) para sa pag-host sa pagselebrar kan paparani nang Regional Hospital Week Celebration kun sain nakatalaan ining isagibo sa Agosto, poon ika-5 sagkod ika-9 kan nasambit na bulan ngonian na taon.
An nasmabit na aktibidad, pangengenotan kan Albay Provincial Health Office (PHO) kaiba an nagkapirang mga partner agencies sa probinsya kan Albay.
Segun sa PGA, an nasambit na selebrasyon, sarong kapaagihan para i-test an kakayahan kan mga personahes kan mga ospital gikan sa mga probinsya kan Albay, Sorsogon, Camarines Sur asin Camarines Norte.
Dugang pa kan gobyerno probinsyal, an sarong semanang selebrasyon, mawot lang ipailing an friendly competition kan manlaen-laen na mga disiplina sa mga aktibidad na saindang pigpreparar.
Nagkaigwa naman subuot nin pag-orolay an PHO kan nakalihis sanang aldaw manungod sa pagsasapinal kan mga programa asin pagbugtak nin mga gibuhon kan saindang mga personahes. Napag-orolayan man an pag-iskedyul mga kawat, pagtanggap sa mga delegado, accountable personnel, asin an saindang respective venues.
Apwera pa kaini, napag-orolayan naman an iba pang aktibidad arog kan Fellowship Night, Battle of the Bands asin Mrs. & Mr. Hospital Week. Presente sa nasambit na pag-orolay an mga miyembro kan Albay PIO, PGO, BU IPESR, PYDO, PGSO, CSU asin PHO.
