NIBATI og kaluoy ang mga personahe sa Lying in nga gibinlan og usa ka bata nga bag-o lang gihimugso gabei sa adlaw nga Lunes, Enero 24 sa kasamtangan nga tuig.
Sa pahayag ni Charito Acosta, hingkod ang pangidaron, tag-iya sa Heavens Gift Lying in Clinic nga nahimutang sa Purok Sta. Cruz, Barangay West, ang unang nakakita sa bata ang niagi sa ilang Lying in unya gisulti kanila nga adunay bata sa ilang lababo sa gawas sa ilang clinic.
Gihulagway ni Acosta nga nakabalot sa lampin ang batang babaye unya bag-o lang naputol ang iyang pusod, adunay pay hilo nga gigamit sa tahi unya aduna pay gamay nga dugo, samtang tugnaw ang lawas sa bata apan wala kini nagahilak, sa ilang pagkuha ilaha nga gitimbang anaa kini sa tulo ka kilogramos, daku ug taas nga pagkabata.
Gipaklaro ni Acosta nga dili gikan sa ilang lying in ang bata, igo lang daw kini nga gibilin sa ilang lababo apan nagduda siya nga sa balay lang gihimugso unya gibilin sa ilaha.
Tungod niini nagtawag siya sa Pendatun Police Station unya na-adtuan nilang PCpl Aldrin Gualta ug ni Psms Rosalie Araiza WCPD sa presento uno.
Samtang nagrespondi usab si Kapitan Yolando Acharon ug ang chairperson sa Komitiba sa Social Services sa barangay nga si Isabelita Santiago, ilang gi-rescue ang bata unya gitugyan sa House of Shiloh House of Hope Gensan.
Samtang sa dugang impormasyon gikan kay Kagawad Santiago ilaha nga giproseso ang pagpa swab test sa bata gumikan usa kini ka rekositos sa House of Shiloh.
Samtang naghatag reaksyon ang usa ka lola nga si Tata gikan sa West sumala niini nga kaluoy sa bata ug ang iyang mensahe sa inahan nga kalisod daw sa paghimo og bata, pasiaw niiini nga nagapanakit gayod daw ang iyang kalawasan ug ulo sa paghimo og bata mao nga alang kaniya dili gayod angay ipang bilin lang ang bata human nahimugso sa sabakan.
Si Tata adunay lima ka anak ug aduna na usab mga apo unya nagatrabaho sa Lying In kung asa gibilin ang lapsag. I Ver Diazon
