CAMARINES NORTE- Hanggang April 17 na lamang ang paghahain ng Income Tax Returns o ITR.
Kaya naman muling nagpaalala ang Bureau of Internal Revenue (BIR) sa mga taxpayer na gawin na ito bago o sa itinakdang petsa upang makaiwas sa penalidad.
Ayon kay Revenue District Officer Felix Roy kapag nabigo ang taxpayer na magfile ng ITR sa itinakdang petsa ay papatawan ng 25 % surcharge ang tax due at compromise penalty.
Bukod dito mayroon ding babayarang interest na 12 % per annum.
Ani Roy may nakatalagang Tax Assistance Center ang BIR sa mall at ilang business establishment tulad sa SM City Daet, New One Department Store, Houseware Plaza Supermarket at LCC sa Labo.
Mayroong mga tauhan ang BIR sa mga nabanggit na center upang umalalay sa mga taxpayer sa paghahain ng kanilang ITR.
Maari ding gamitin ang E- services ng ahensiya para hindi na kakailanganing pumunta sa opisina dahil kumpara dati ay mas convenient ang paghahain ng ITR ngayon.
Una na ring inanunsiyo ng BIR main office na walang extension sa filing and payment.
Magreresulta daw kasi ito sa hindi sapat na pondo para sa mga programa ng gobyerno.
Samantala, aminado naman si Roy na kinapus ang BIR- RDO 64 sa kanilang goal noong 2022 pero mas mataas naman aniya ang kanilang koleksyon kumpara noong 2021.
