LAKIP ang persons deprived of liberty (PDLs) sa priority group nga bakunahan batok Covid-19. Matud ni Jail Superintendent Mitz Melton Placencia, jail warden sa GenSan City Jail ilawom sa priority eligible group B-9 ang mga PDL.
Gilatag na usab sa Bureau of Jail Management and Penology (BJMP) ug Bureau of Correction ang seguridad ugaling mahitabo ang pagbakuna. Tungod niini, butyag ni Placencia dili ‘neglected’ ang mga piniriso labi na sa hisgotang Covid-19 response.
Sa karon naa sa 1,210 ang kinatibuk-ang inmate sulod sa male facilities samtang naa sa 100 kapin ang naa sa female dormitory. Giangkon usab ni Placencia nga ‘congested’ og naa sa 480% tungod naa lang unta sa 350 ang kapasidad sa ilang matag selda.
Kahibaloan nga gihangyo sa Commission on Human Rights (CHR) nga angayang ikonsidera sa DOH ang paglakip sa PDL sa distribusyon sa Covid-19 vaccines. ( Richel Gubalani)
