GIBANTAYAN karon sa Philippine Drug Enforcement Agency (PDEA) 12 ang posibleng kalambigitan sa aktibidad sa iligal nga droga sa pipila ka local candidates o aspirants sa May 2022 elections.
Gibutyag kini ni Kath Abad, tigpamaba sa PDEA-12 dungan sa pagkakumpiska sa P8.6 milyon kantidad sa shabu ug marijuana dungan sa isa ka bulan nga operasyon sa rehiyon.
Matud niini, nagpahigayon na og surveillance ang intelligence ug enforcement units nila sa listahan sa target personalities.
Nagdumili si Abad nga mohatag og dugang detalye apan gisiguro nga gibantayan ang tanan sama sa supporters, financiers ug protectors. “Of course dili man gyud nato ma-deny na naa tay gina-investigate na possible involved ani nga mga engon ani nga activity, election o dili election padayon mana nato siyang ginabuhat,” asoy ni Abad.
Bag-ohay lang nasikop sa otoridad si Tom Nandang, alyas Datukon Nandang, 33-anyos taga Barangay Upper Glad 1, Midsayap, North Cotabato. Si Nandang, ang gikonsiderang high-value target sa PDEA, usa ka mayoralty candidate sa Northern Kabuntalan, Maguindanao. I Richel Gubalani
