ANAA na sa plenary sa Sangguniang Panlalawigan sa South Cotabato ang pagtuki sa amendments sa Environmental Code nga nagadili sa open pit mining sa probinsya.
Kini ang gibutyag ni South Cotabato Gov. Reynaldo Tamayo subay sa pagpangutana niini sa chairperson sa Committee on Environment sa sa Sangguniang Panlalawigan sa probinsya human matud pa maaprobahan sa komitiba ang pagbasura na sa pagdili sa open pit mining.
Hinuon dugang niini, magpahigayon pa og public hearing kalabot sa maong ordinansa.
Samtang gitino usab sa gobernador nga anaa na usab sa pagbuot sa mga board member ang pagpasa sa maong ordinansa tungod bisan siya mobabag o dili, wala gihapon matud pa siyay mahimo tungod nag-inusara ug dili gihapon mosalir ang iyang veto power.
Sa pikas bahin, gikumpirma ni Tamayo nga miadto sa Tampakan si DENR Sec. Roy Cimatu apan wala siya makaapil sa panaghisgot apan mihapit lang sa iyang opisina sa pagpauli na sa kalihim ug wala mahisgutan ang planong pagtugot sa open pit mining sa lugar.
