GITUN-AN ang posibilidad sa pag-file og motion for reconsideration sa kampo sa namatay’ng flight attendant.Human gibasura sa Makati Prosecutor’s Office ang reklamong gipasaka sa National Bureau of Investigation (NBI) batok sa mga kauban ni Christine Dacera.
Matud ni Sharon, wala pa nila nadawat opisyal ang dokumento gikan sa prosecutor’s office apan nadungog niya kini sa balita. Makig-alayon kini sa NBI ug mga abogado alang sa lakang apan gikonsidera niya karon ang pagsumite og MR.
Gikasubo niya ang desisyon sa prosecutor’s office tungod nagtuo siya nga lig-on ang ebedensiya nga gisumite sa NBI sa kaso sa anak. Gibasura sa prosecutors ang reklamong drug violation batok sa kauban sa flight attendant tungod sa kakulangon sa ebedensiya ug pag-negatibo sa mga nasangpit sa paggamit sa iligal nga droga.
Nabasura usab ang reklamong sulay sa pagdeliber og iligal nga droga tungod sa ‘absence’ sa dangerous drugs. Lakip sa reklamong gi-dismissed mao ang obstruction of justice, perjury ug reckless imprudence resulting in homicide. Nagmaya usab si Sharon sa pag-dismissed gipasakang reklamo batok kaniya sama sa illegal detention, arbitrary detention, unlawful arrest, unjust vexation, perjury, slander, libel, cyberlibel ug incriminating innocent person.
Gihingusgan sa nasangpit nga himo-himo lang ang reklamong gipasaka batok kaniya. Alas-12:30 sa hapon Enero 01, 2021 napalgang nawad-an og panimuot si Christine sa bathtub sa Makati hotel human ang usa ka gabii sumala pa nga party, gidala kini sa Makati Medical Center apan gideklarang patay. I Richel Gubalani
