Gin-aprobaran ni Provincial Council for the Protection of Children (PCPC) chair, Governor Edwin Ongchuan an rekomendasyon nga mag-install hin damo pa nga mga handwashing facilities ha mga eskwelahan.
Ini in agud ig-promote an malimpyo nga panlawas ngan sakto nga sanitasyon han mga estudyante ha probinsya han Northern Samar.
Ha pamaagi han mosyon, ginsuhestiyon ni Provincial Social Welfare and Development Officer Jenny Darish an pondo para ha mga handwashing facilities tikang ha Special Education Fund (SEF) han Provincial Government nga dayon naaprobaran han Provincial School Board (PSB).
An mao nga inisyatibo in usa la ha mga child development interventions ngan ginpaghimangrawan han PCPC durante han 3rd Quarterly Meeting nga gindumara ha Sumuroy Hall, Provincial Capitol.
Gin-aaghat naman ni Governor Ongchuan an mga miyembro han pira nga mga organisasyon nga magpartisipar ha pagpatuman ngan pagmonitor han mga programa ngan interbensyon para ha kumunidad ngan kabataan.
