Ilalahad umano ni Pangulong Ferdinand Marcos Jr. sa kanyang kapwa mga state leaders sa upcoming Association of Southeast Asian Nations (ASEAN) Summit ang mga isyu na may kaugnayan sa food at energy security, digital transformation at economy, maging ang South China Sea.
Sa pre-departure briefing, sinabi ni Department of Foreign Affairs (DFA) Assistant Secretary for ASEAN Affairs Daniel Espiritu na bahagi ng top priority ni Marcos sa naturang pagtitipon ay ang post-pandemic economic recovery at ang digital transformation at ekonomiya.
Maliban dito, ilalatag din umano ni Marcos ang kanyang foreign policy priorities bilang pang ika-17 pangulo ng Pilipinas, maging ang kanyang pananaw sa climate change.
Dagdag ni Espiritu, na muling igigiit ng pangulo ang panawagan ng bansa para sa pagpapatupad sa five-point consensus, na napagkasunduan ng ASEAN member states para pigilan ang karahasan sa junta-ruled Myanmar, at manawagan ng dayalogo sa mga kinauukulang partido.
