Mas gipakusgan pa karon ang ginahimong mobile ug beat patrol sa Calinan Police station sa ilang area of responsibility aron nga papugngan ang bisan unsang matang sa kriminalidad.
Kini nuot sa nahitabong riot sa milabay’ng Mayo 15, 2024 sa Prk. 5, Brgy Riverside, Davao-Bukidnon Highway, Calinan, ning syudad partikular na atbang sa Pryce Gas establishment.
Sa imbestigasyon, alas- 11:40 sa gabii sa maong adlaw, usa ka concerned citizen ang nagpahibalo sa kapulisan nga dunay nahitabong riot sa maong lugar, apan wala na kini naabtan sa otoridad.
Saysay sa pipila ka mga bystanders, paspas nga mikagiw ang mga nag-riot human namatikdan nga padulong na ang mobile sa pulis.
Posibleng hinungdan sa maong kagubot mao ang puros lango sa ilimnong makahubog labi pa nga nagasaulog sa kapyestahan ang Brgy. Riverside anang adlawa.
Gibutyag sa Davao City Police Office nga walay mireport sa buhatan sa pulis nga dunay nasamdan o kadaut sa propedad human sa maong insedente.
