Pila sa mga posibleng maapektuhan sa oras nga maipatukod ro tatlong turbina o wind turbine it Petrowind Energy sa Brgy. Napaan, hay ro pangabuhian it mga residente sa Brgy. Nabaoy, Malay, Aklan.
Raya hay bangud ro mga turbina hay igapatukod sa kilid it bukid it Napaan, ag kung nag umpisa eon nga magkutkot agud butangan it poste, ro eapok hay magaagto sa Nabaoy river.
Raya ro ginpaabot nga sentimyento it mga taga Brgy. Nabaoy, Malay, Aklan.
Madueaan it pangabuhian ro mga residente it Nabaoy partikular ro mga nagadakop it ueang o patuyaw nga naga abot ro income sa 2 milyong piso sa sueod it sang dag on.
Posible man nga maapektuhan ro mga negosyong resorts sa Nabaoy ag ro pinakamabahoe nga problema hay basi maapektuhan ro gina-distribute nga tubi sa mainland Malay ag Boracay, bangud ro Nabaoy river ro main source it andang tubi.
Sa pihak it pagwelga it mga taga Nabaoy sa atubang it munisipyo it Malay, owa it natabo nga maayos nga pag istorya bangud tanan hay gustong magpaabot it andang sentimyento. // ANN DESLENE SALAZAR
