Patay ang isa ka panday matapos ginluthang sang isa ka Barangay Tanod sa Murcita Ville Brgy. Sta Fe, Pilar, Capiz takna alas 9:30 kagabi sang Huwebes, Agosto 31.
Ginkilala ang napatay kay Jerome Alarcon, 41-anyos samtang ang suspek amo si Jomar Bacea, yara sa legal nga pang-edaron kag lunsay mga residente sang nasambit nga lugar.
Sa interview sang Brigada News FM Roxas City kay PMAJ. Alfred De Leon, hepe sang Pilar Municipal Police Station, iya ginpahayag nga base sa panaysayon sang live-in partner ni Alarcon nga si Beverly Bautista, temprano palang kahapon sang Huwebes, nag-angkon na sang pagbinaisay sanday Alarcon kag Bacea bangud sa bulkitan.
Ginapahayag nga may yara sang bulkitan ang suspek malapit sa paradahan sang tricycle kun sa diin nagpahayag ang biktima nga magatukod man ini sang bulkitan sa barato nga presyo gani gin-kaakig ini sang suspek.
Dugang pa ni De Leon, pag-abot sang gab-i, pila na ka beses balikon sang suspek ang balay sang biktima kag nagpahayag nga “Hulat kada kay balikon taka” kag sa iya pagbalik nakit-an niya sini ang biktima nga nagapaguwa sa balay kun sa diin ginluthang niya ini sang tatlo ka beses.
Bangud sa natabo, nag-angkon sang pilas sa dughan kag tiyan ang biktima nga gintunaan sang iya kamatayon.
Madasig naman nga nagpalagyo ang suspek matapos ang nakumiter nga krimen.
Indi pa matumod kun ano nga armas-luthang ang gingamit sa nasambit nga insidente.
Sa karon, padayon pa ang hot pursuit operation sang mga kapulisan sa suspek. | Judy Ann Juare
