NANGAYO og tabang ang pamilya sa driver sa top down nga nabanggaan sa freezer van sa National Highway Makar Road, Barangay Tambler, Hulyo 22 sa udto tungod nadala kini sa ospital ug kinahanglan nga ma-CT scan ang iyang ulo.
Matud ni PLt. Rodel Ventura, Assistant Chief sa Traffic Enforcement Unit sa GenSan ang freezer van nga gimaneho ni Cornell Jeff Reyes, 36-anyos, taga Brgy. Panakan, Davao City padulong na unta sila sa fish port aron moangkat og isda.
Nakasugat niini atbang sa Philbest canning sa Brgy. Tambler ang driver sa top down nga si Jeffrey Millan, 27 -anyos taga San Miguel, Brgy.
Calumpang, tungod sa kabug-at sa karga nga isda sa driver sa top-down misimplang kini ug nisulod sa opposite nga linya sa freezer van hinungdan sa pagbangga-anay.
Segun sa inahan sa top-down driver nga si Efipania Millan daghang samad ang naangkon sa iyang anak tungod sa kusog nga impact sa pagbangga, nagkinahanglan sila og dako nga kantidad aron maluwas ang kinabuhi sa iyang anak nga anaa sa St. Elizabeth hospital rason nga nangayo siya og tabang sa driver sa freezer van nga maoy nakabangga niini.
Giangkon sa freezer van driver nga si Reyes, hinay iyang dagan ug wala na niya nalikayan ang topdown gumikan kalit kaayo ang panghitabo.
Wala niini damha nga mosangko sa maong sitwasyon tungod nagmaneho lang siya sa sakyanan sa iyang amo aron mopalit og isda sa GenSan. Naghimo og kasabutan ang pamilya sa biktima tali sa driver ug sa tag-iya sa van aron masulbad ang problema ug matambalan ang biktima nga nagpabilin sa ospital. I Enamie Mogpon
